फर्ग्युसन महाविद्यालयाने वार्षिक शुल्कात वाढ केल्याने ग्रामिण व दुर्गम भागातील वंचित घटकांना ही शुल्कवाढ भरणे शक्य नाही.या संदर्भात सावित्रीबाई फुले पुणे विद्यापीठाने शुल्क वाढ न करण्याची सुचना सर्व संलग्न महाविद्यालयांना केली होती.तसेच महाराष्ट्र शासन उच्च शिक्षण संचालनालय यांनी सुद्धा परिपत्रक काढून या शैक्षणिक वर्षात शुल्क वाढ करू नये असे सांगितले असे असताना सुद्धा फर्ग्युसन महाविद्यालयाने मागिल वर्षी पदवी प्रथम वर्षासाठी शुल्क वाढ केली होती.गेल्या वर्षी द्वितीय वर्ष कला शाखेसाठी २४७० रू , विज्ञान शाखेसाठी ३५५० रू शुल्क होते.या पार्श्वभूमीवर यंदा शुल्कवाढ करून कला शाखेसाठी ६४७० रू आणि विज्ञान शाखेसाठी ७५५० रू निश्र्चित करण्यात आले आहे.डेक्कन एज्युकेशन सोसायटीच्या नियामक मंडळाच्या अध्यक्षांनी सावित्रीबाई फुले पुणे विद्यापीठाच्या परिपत्रकास केराची टोपली दाखवून अडीचपट शुल्कवाढ केली आहे.
           कोरोनामुळे आर्थिक चक्रास मोठा फटका बसला आहे.अनेकांचे रोजगार गेले आहेत . एकवेळ जेवणाची भ्रांत असलेल्या गरिबी कुटुंबातील विद्यार्थ्यांना वाढीव शुल्क भरणे शक्य नाही. आज खाजगी शिक्षण संस्थाचालकांनी शिक्षणाची नविन मक्तेदारी निर्माण केली आहे.ज्यांच्याकडे पैसा तोच शिक्षण घेण्यास पात्र अशी आँनलाईन शिक्षण पद्धती झाली आहे.शिक्षण संस्थाचालकांच्या आर्थिक गणित जुळवता – जुळवता महाराष्ट्राची संपुर्ण पिढी बरबाद होताना दिसते.या शुल्कवाढीला रयत विद्यार्थी परिषदेने कडाडून विरोध केला असून जर शुल्कवाढ सात दिवसांत मागे घेतली गेली नाही तर रयत विद्यार्थी परिषद विद्यार्थ्यांच्या हितासाठी तीव्र स्वरूपाचे आंदोलन करेल असा अल्टीमेटम रयत विद्यार्थी परिषदेने महाविद्यालयाचे प्राचार्य रविंद्रसिंह परदेशी यांना निवेदनामार्फत दिला यावेळी उपस्थित रयत विद्यार्थी परिषदेचे अध्यक्ष सुर्यकांत सरवदे, रविराज काळे, ऋषिकेश कानवटे , ओमकार भोईर,अजय चव्हाण उपस्थित होते.